رٹے کا تعلیمی نظام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
The Global System of Rote Learning
مصنف وحید مراد
کی تصنیف کا تحقیقی و تنقیدی مطالعہ
۔
میرے فیس بک کے دوست محترم وحید مراد کی تصنیف "رٹے کا تعلیمی نظام" پاکستان کے تعلیمی بحران کو محض نصابی یا انتظامی مسئلے کے طور پر ہی نہیں بلکہ ایک فکری، نفسیاتی اور تہذیبی بحران کے طور پر پیش کرتی ہے۔ مصنف نے اپنے آٹھ ابواب میں تعلیم کے مختلف پہلوؤں یعنی رٹہ کلچر، ادارہ جاتی جبر، ذہنی غلامی، سائنسی بے سمتی اور شعور کی معطلی، کو نہایت بصیرت کے ساتھ آشکار کیا ہے۔ مصنف کا مقصد محض اصلاحِ نصاب نہیں بلکہ اصلاحِ فکر و شعور بھی ہے۔
قابل مصنف کا استدلال اس پر قائم ہے کہ تعلیم کا اصل مقصد یادداشت نہیں بلکہ فہم، تجزیہ اور اطلاق (Comprehension, Analysis & Application) ہے۔ وہ تعلیم کو رسوم پر مبنی سرگرمی (Ritualized Activity) کے طور پر پیش کرتے ہیں جو علم کے بجائے علامتی کامیابی (Symbolic Success) ہے۔ مصنف کا نقطۂ نظر علمیات (Epistemology) کے اس سوال سے جڑا ہوا ہے کہ علم کیا ہے اور کیسے حاصل ہوتا ہے؟۔ ان کے نزدیک ہمارا موجودہ نظام تعلیم علم کے فہم کو میکانیکی یادداشت میں بدل دیتا ہے۔ یہی وہ مقام ہے جہاں وہ تعلیمی نظریہ دانوں جیسے جان ڈیوی (Dewey) اور پاؤلو فریرے (Freire) کے فکری راستے پر دکھائی دیتے ہیں یعنی تعلیم کو سماجی تبدیلی کا آلہ سمجھنا نہ کہ محض پیشہ ورانہ تربیت۔
تحقیقی اسلوب میں مختلف تعلیمی ڈھانچوں (Cambridge, GED, Skill-based Learning) کا تقابلی تجزیہ بھی ہے۔ ان کی یہ تحریرتعلیمی تحقیق کے Comparative Education Framework میں آتی ہے وہ ثابت کرتے ہیں کہ نظامِ تعلیم کی نوعیت دراصل سماجی طاقت کے ڈھانچوں کی آئینہ دار ہوتی ہے۔
کمال کی بات یہ ہے کہ ادبی لحاظ سے یہ کتاب ایک خشک علمی مقالہ نہیں ہے بلکہ ایک زندہ فکری نثری شاہکار ہے۔ وحید مراد نے نثر میں طنز، تمثیل اور استعاراتی اظہار کے ذریعے اپنے بیانیے کو جاندار بنایا ہے۔ رٹا سسٹم پھانسی کا پھندا جیسا عنوان خود اپنی معنوی شدت سے قاری کو جھنجھوڑ دیتا ہے۔ ان کے جملوں میں ایک فکری کشش اور داخلی درد ہے جو ادب اور تنقید کے سنگم پر تحریر کو ایک فکری تجربہ (Cognitive Experience) بنا دیتا ہے۔
ان کا بیانیہ نظری حقیقت (Conceptual Truth) کو جذباتی صداقت (Emotional Truth) کے ساتھ جوڑتا ہے یہی توازن کتاب کو محض علمی نہیں بلکہ ادبی استدلالی متن بنا دیتا ہے جو ان ادبی ذوق کی عکاسی ہے۔ وحید مراد تعلیم کو محض معلوماتی عمل نہیں بلکہ ایک نفسیاتی تشکیلِ شعور (Psychological Formation of Consciousness) سمجھتے ہیں۔ ذہنی غلامی اور اجتماعی نفسیاتِ رٹہ میں وہ اس عمل کو Social Conditioning کے تناظر میں دیکھتے ہیں۔ ان کے مطابق رٹہ کلچر ایک ایسا نفسیاتی میکانزم ہے جو طلبہ میں “Performance Anxiety”، “Fear of Failure” اور “Learned Helplessness” پیدا کرتا ہے۔ یہ نظریہ جدید تعلیمی نفسیات (Educational Psychology) کے تصورِ Cognitive Dissonance سے ہم آہنگ ہے جس کے مطابق ایک طالب علم کے فہم اور ادارہ جاتی توقعات کے درمیان تضاد اس کی تخلیقی صلاحیت کو مفلوج کر دیتا ہے۔
مصنف کے نزدیک یہ نظام ذہنی غلامی کو Self-Internalized Oppression کی صورت میں راسخ کر دیتا ہے جس کے نتیجے میں سیکھنے والا فرد سوچنے کے بجائے صرف دہرانے کا عادی ہو جاتا ہے۔ باب ششم میں باشعور مصنف نے ٹیکنالوجی اور مصنوعی ذہانت کے کردار پر نہایت متوازن اور سائنسی انداز میں نظر ڈالی ہے۔ وہ اس سوال کو اٹھاتے ہیں کہ آیا AI تعلیم میں فہم کو بڑھائے گی یا محض معلوماتی شور میں اضافہ کرے گی؟
یہ بحث جدید “Neuroeducation” کے مباحث سے جڑی ہے جہاں یہ سوال زیرِ تحقیق ہے کہ آیا ڈیجیٹل لرننگ انسانی Meta-Cognition کو بہتر بناتی ہے یا کمزور؟
مصنف اس نتیجے پر پہنچتے ہیں کہ ٹیکنالوجی اگر شعور کے بغیر استعمال ہو تو وہ جادوگر الفاظ بن جاتی ہے۔ یعنی Simulation of Understanding نہ کہ Understanding itself۔ ان کا یہ مؤقف تعلیمی سائنس میں Cognitive Realism vs. Digital Illusion کے مباحث سے ہم آہنگ ہے۔
کتاب کا مرکزی مقدمہ یہی ہے کہ رٹے کا نظام دراصل سماجی جمود (Social Stagnation) کی علامت ہے۔ وحید مراد کے نزدیک تعلیم ایک “سماجی عمل” (Social Process) ہے جو فرد اور معاشرے دونوں کو تشکیل دیتا ہے۔ باب دوم میں اداروں کے کردار پر بحث دراصل طاقت کے Institutional Discourse کی تنقید ہے۔ وہ تعلیمی اداروں کو سماجی طاقت کی تولیدی مشین (Reproductive Mechanism of Power) قرار دیتے ہیں، جو بوردیو (Bourdieu) کے “Cultural Capital” کے تصور سے مماثلت رکھتا ہے۔
وہ فرقہ واریت اور ذہنی جمود کو رٹہ کلچر کی پیداوار بتا کر تعلیم اور سماجی تقسیم کے باہمی تعلق کو عیاں کرتے ہیں۔ ان کے نزدیک رٹہ کلچر Critical Consciousness کو دبا کر سماجی یکسانیت اور فکری ناپختگی پیدا کرتا ہے۔
کتاب کے آخری ابواب خاص طور پر باب ہفتم اور ہشتم میں انہوں نے حقیقی تعلیم کا تصور پیش کیا ہے جو Holistic Education اور Organic Learning کے نظریات سے گہرا تعلق رکھتا ہے۔ ان کے نزدیک تعلیم کا مقصد “متوازن شخصیت” (Balanced Personality) کی تشکیل ہے، جس میں فہم، ذوق، رجحان اور شعور ایک ساتھ پروان چڑھیں۔ یہ وہ تصور ہے جو جان ڈیوی کے “Learning by Doing” اور کارل راجرز کے “Learner-Centered Education” سے مطابقت رکھتا ہے۔ باب نہم میں "ایکو سسٹم" اور "نامیاتی تعلیم" کا تصور ماحولیاتی نفسیات (Environmental Psychology) کے تناظر میں تعلیم کو نئے زاویے سے دیکھتے ہیں کہ سیکھنا صرف دماغ کا عمل نہیں بلکہ ماحول، خاندان اور معاشرتی تعلقات کی باہمی ہم آہنگی کا نتیجہ ہے۔
وحید مراد کی فکر کا بنیادی محور یہ ہے کہ تعلیم محض ہنر یا یادداشت کا کھیل نہیں بلکہ شعور کی بیداری ہے۔ ان کے نزدیک موجودہ نظام فرد کو "عالم" نہیں بلکہ "مشین" بناتا ہے۔ بہرحال کتاب کا مجموعی بیانیہ ایک Pedagogical Protest ہے یعنی تعلیمی جبر کے خلاف فکری مزاحمت۔ وہ تعلیم کو معلومات کی ترسیل کے بجائے شعور کی تخلیق کے طور پر دیکھنے کی دعوت دیتے ہیں۔ یہی وہ نکتہ ہے جو ان کی تحریر کو محض تنقید نہیں بلکہ اصلاحی فلسفۂ تعلیم (Philosophy of Educational Reform) بنا دیتا ہے۔
یہ کتاب پاکستان کے تعلیمی منظرنامے میں ایک فکری سنگ میل کی حیثیت رکھتی ہے جو سوال اٹھانے کی جرأت پیدا کرتی ہے۔ ان کی فکر کی روشنی میں یہ بصیرت ملتی ہے۔ کہ جب تک تعلیم آزادیِ فکر، شعورِ ذات اور فہمِ تخلیق کا ذریعہ نہیں بنتی تب تک قومیں ترقی نہیں بلکہ تکرار پیدا کرتی ہیں۔ اللہ کرے زور قلم اور زیادہ۔
۔
ظفر محمود

Book by Waheed Murad